نور الهدى فؤاد

1- اتكلم..

من أهم أسباب تعاستنا عموما السكوت.. كتم المشاعر بحلوها ومرها.. حلوها مع الوقت بيدبل وبيفوت أوانه ومرها بيكبر لحد ما يبلع أي حلو جمبها.. قول بحبك قول كرهتك.. قول قول على رأي عبد الحليم.. قول انا زعلان، قول انا مخبي عليك كذا وكذا، قول انا تعبان، انا محتاجلك، انت وحشتني، انت بعيد اوي، أنت لسه بتحبني ولا مشاعرك اتغيرت.. انطقوا يا جماعة واسألوا وافهموا.. لو مفيش سكنة بينك وبين الطرف التاني لدرجة انك تقدر تقول كل الي في نفسك.. يبقى بلاها أحسن.

2- اسمع..

وزي ما عندنا أزمة صمت عندنا كمان ازمة انصات، ازاي تبقى محتاج من الطرف التاني حبه ودعمه واهتمامه وانت مبتعرفش تسمعله.. مش منتبه لزعله أو شكوته أو فضفضته بس حتى، ازاي تسمي نفسك حبيب او تسمي نفسِك شريكة حياته وهو بيثق في صحابه أكتر منك أو بيلجأ لأخته أو أخوه قبلك لما يكون مخنوق ومهموم.. ازاي تسمح لنفسك تتفرج عليها وهي بتشتكي لصاحبتها أو في مخلوق تاني مهما كان مين هو سرها ومساحة أمانها قبل منك..

3- بطل أنانية..

من حقك تدور على راحتك وتتمسك بالاختيارات الي تناسبك، بس كل البشر في الدنيا كمان عندهم نفس الحق ده.. كلنا عايشين بندور على سعادتنا وانبساطنا وشوية الحجات القليلة الي بتيجي على هوانا ومزاجنا وسط قرف الحياة.. ما بالك بأول شخص مسؤول عن سعادتك وانت مسؤول عن سعادته.. ده أولى الناس الي تشغل نفسك بمزاجه.. بيحب ايه وبيكره ايه.. ايه الي بيزعله وايه الي بيرضيه.. ايه الي يخليه يشوفك أكتر شخص حافظه في الدنيا واكتر شخص بيحب يشوفه مبسوط.. وحتى لو مختلفين وانبساطكو متعارض.. لازم تشتغلوا سوا على نقطة «انا هكون مبسوط انك انت مبسوط» ومرة عليك ومرة عليه هتلاقي كل واحد فيكو لوحده بيبادر يثبت انه بيحب التاني اكتر وبيحب يرضيه..

4- بادر..

معظمنا عنده حتة كبرياء أهم عنده من سعادته وحياته كلها، ده سعات بيكون مهم جدا جدا تجاه حد بايعك أو كل تصرفاته بتنطق وبتقول مش عايزك في حياتي.. لكن برضه سعات كتير الكبرياء ده بنستخدمه غلط ومش بنأذي بيه غير نفسنا.. ودايما بتكون نتيجة ده الندم ومعاه سؤال عمرك ما هتلاقيله إجابة وهو ياترى لو كنت عملت كذا مكنتش خسرته؟ او هو انا لما سكتت كان المفروض اتكلم؟ هو انا كان ممكن اديله فرصة تانية؟ هو انا استعجلت؟ هو انا ليه مسألتوش عشان افهم؟ مش يمكن انا ظلمته؟
ولذلك اول ما تحس ان النهاية بتقرب، خلي دايما عندك حس المبادرة، ابدأ انت بالكلام، اسأل، ادي فرص كتير، اسمع كويس واتناقش، بادر بكلمة حلوة او هدية واستغل الفلانتين مثلا، ده مش تنازل عن كرامتك خالص، ده إجراء اسمه «لعلي فاهم غلط»، وهتحس بقيمته العظيمة جدا بعدين.. ياما تسيب ايدك وتبسطها تماما فيسقط ما يستحق ان يسقط دون ذرة شك واحدة أو أي احتمالات للندم.. ياما تقبض عليه عن يقين وتنقذ حبك وتوفر على نفسك الكثير من الألم والضياع والفقد والبدء من الصفر.. .. بادر فورا

5- أعرف نفسك..

للأسف معظمنا ميعرفش نفسه بجد.. مش عارفين احنا مين وصفاتنا ايه، عيوبنا ومميزاتنا وقدراتنا.. مش مهتمين نقيم نفسنا ربع ما بنقيم العالم حوالينا.. مش عارفين احنا عايزين ايه من حياتنا ولا عايزين ايه من الارتباط، منعرفش بالظبط ايه احتياجاتنا النفسية او العاطفية، طب ازاي نكون مش فاهمين نفسنا ومستنيين الآخر يفهمنا.. تخيل كدة انك بتربي كائن وبتحبه جدا بس متعرفش بياكل ايه؟ هيموت طبعا..
لازم تركز مع نفسك وتصاحبها وتتعاطف معاها احيانا وتعاقبها احيانا وتقومها وتعترفلها انك غلطت وتراقبها وتحدد نقط الضعف فيها وقد ما تقدر تشتغل عليها.. وتبقى مستوعب ومحدد وانت بتقرب من حد وعايزه شريك حياتك انت عايز منه ايه وتقدر تقدمله ايه بالمقابل.. تفهمك لاحتياجاتك وقدراتك بتوفر عليك قبل ما توفر على غيرك وقت ومجهود وفرهدة ملهاش لازمة.. لما تكون فاهم نفسك بتقدر بسهولة تحدد اهدافك وتتفادى مقدما الاختيارات الغلط، ده غير انه بيساعدك تفهم غيرك.. تقديرك لنفسك بيسهل عليك تقديرك لغيرك وتفهم متطلباته واحترامها.. لأنك عايز لنفسك بالمثل..

6- اجتهد..

بعكس ما معظم الناس في مجتمعنا للأسف متناسين عن جهل.. أيوة العلاقات الانسانية كلها محتاجة مجهود واجتهاد وخطة عمل واستراتيجية ودراسة جدوى مسبقة.. عشان تنجح.. ولما تنجح تكون انت مبسوط وتلاقي السعادة الي طول عمرك بتحلم بيها..
يعني عشان تشتغل وتكسب فلوس بتجتهد وتتعب وعشان تنجح في دراستك بتجتهد وتذاكر وعشان تعيش حياة مريحة بتجتهد وتتعلم حجات جديدة وتقرا وعشان تلاقي اصحاب تتونس وتتسند عليهم بتجتهد وتسأل عليهم وتهتم بيهم وتقابلهم وتراعي زعلهم..
لكن تيجي لحد علاقتك بشريك حياتك الي المفروض يبقى اقرب اقرب اقرب شخص ليك في الدنيا لأنه في أدق دايرة خصوصيتك والشخص الوحيد الي عايز تسكن اليه اخر اليوم ويشيلك وانت مريض وكلمته الحلوة تحلي يومك وتكشيرته تقفل يومك.. لحد ده ومش عايز تجتهد وتتعب وتحاول وتقاوم وتسعى وتجري وتتحمل وتتغاضى وتصبر وتعذر وتقدر وتذاكر وتفكر وتسمع وتستفسر وتتنازل وتركز وتجاوب..

7- آمن بالحب..

كلنا اتعرضنا لخيبات وخذلانات واتزلزلنا واتكسرتنا ستين حتة واتحطمت أحلامنا قدام عنينا ووقفنا نتفرج بمنتهى العجز.. كلنا بلا استثناء.. لكن ده عمره ما كان معناه ان السعادة مستحيلة.. أو ان مفيش أمل.. طول ما في فيك نفس كل حاجة واردة وممكنة.. والحياة رغم قسوتها لكنها مبدعة في مفاجأتنا طول الوقت.. لو صدقت من جواك ان السعادة ممكنة مسيرك هتلاقيها.. ده مش كدة وبس احساسك انك طمعان في بكرة ومصدق ان ربنا هيعملك المستحيل هيخليك قريب منه طول الوقت.. سهل تقرى علاماته وتلاحظ إشاراته عن غيرك.. لحد ما يقع في ايدك..
الحب أعظم نعمة ربنا وضعها في الأرض.. أوعى تشوفه ضعف.. أوعى تتخلى عنه.. أوعى تفقد معناه ومتعته من جواك.. أوعى تكرهه مهما وجعك.. أوعى تبطل تستناه..