مهرجانات سينما

ترشيحات الأفلام في اليوم الثالث لمهرجان القاهرة السينمائي

 

الناقد رامي المتولي يقدم ترشيحات مشاهدة أفلام اليوم التالت في مهرجان القاهرة السينمائي الدولي:

المسرح الكبير:

12:00 PM- Pause:

زوجة مقهورة وبيمارس عليها تسلط عنيف من زوجها، حياتها رتيبة ونمطية بتتفاعل مع اللى حواليها بدرجات متفاوته، الفيلم دراما نفسية بتشرح طريقة تفاعلات هذه السيدة وتصرفاتها بناء على عقدها.. التمثيل والحوار أفضل عناصر الفيلم.

مركز الإبداع:

9:30 PM- The Silence of Other:

وثائقى عن فترة حكم الجنرال فرانكو لأسبانيا، الفيلم مميز انه بيأخدنا فى رحلة مع الكفاح المستمر لمن ثاروا ضد حكمه ونجوا من الموت ومحاولاتهم لمحاكمة رموز النظام ومحو اثارهم من أسبانيا مع جهودهم أن محدش ينسى الضاحايا الراحلين، الفيلم من زاوية الناجين والثائرين طبعًا ووثيقة مهمة للمهتمين بالتاريخ واكتشاف تجارب شعوب مختلفة.

سينما الهناجر:

12:00 PM- Bombshell: The Hedy Lamarr Story

تعرف أن هيدى لامار الممثلة العظيمة وأيقونة الجمال والإثارة والتمرد كانت مخترعة؟ لو متعرفش يبقى الفيلم ده مهم علشان تعرف هى اخترعت ايه وازاى فضلها على البشرية كلها لغاية النهاردة ولو تعرف ميضرش الفيلم فيه معلومات مهمة جدًا وتفاصيل دقيقة معتقدش انها اتجمعت فى حته واحدة بالتكثيف ده قبل كده.

3:30 PM- The Place

 

يعود المخرج باولو جينوفيز بفيلم يضم بعضا من أبطال فيلمه السابق Perfect Strangers، يحمل نفس الحالة تقريبا من اختياره لمكان واحد يضم أبطاله ومكون من عدة قصص لشخصيات تتقاطع مع بعضها البعض والجامع بينهم هو شخص واحد يلتقى عنده الجميع، يعتمد بشكل رئيسى على الحوار الذى يقود لإسقاطات ورموز تختلف بمستويات التلقى.

6:30 PM- Fortuna:

فيلم لاجئين بالأبيض والأسود بس مش تقليدى ونواح وبكائيات، الفيلم زى اختيار الوان صورته حاد بيركز على صراع الثقافات والأختلافات العرقية والدينية من خلال قصة حب ربما لو حصلت فى ظروف أخرى وبلد اخرى كانت مرت بس اختلاف الأصول والأديان والبلدان قلبوا المعادلة تماما، فى ديلوجات طويلة فى الفيلم مدعومة بتمثيل جيد جدًأ وتصوير على نفس المستوى.

كريم 1:

1:00 PM- Donbass

فيلم روائى واخد ستايل الوثائقى، متحامل شوية على انصار التواجد الروسى فى أوكرنيا خلال الأزمة الماضية، بس حتى لو نحينا التحامل ده والنظرة المتحيزة للمعسكر الغربى فاحنا قدام انماط للسلوك البشرى تحديدًأ فى الأزمات وفترات الانقلابات وحكم الغوغاء، بناء الفيلم مركب وبيعتمد على التتابع ونقط توقف بتسمح بتحويل الأحداث لمسار آخر ممكن يبان مش مترابط بس هو فى الحقيقة مترابط جدًا وصورته شموليه.

كريم 2:

9:30 PM- Aga

على المستوى البصرى والتكوين والتلوين ده من افضل الافلام اللى شفتها السنة دى، على مستوى القراءات المتعددة المستويات هو فيلم جيد جدًا بيعتمد على الصورة والتمثيل الصامت بأقل قدر ممكن من الحوار يعنى أداة الخطابة متعطلة عند الممثلين تقريبًا معظم دقايق الفيلم، بس التجربة إنسانية جدًا وهتغير فى نظرة الأنسان للبيئة والطبيعة حوله.

مول العرب:

3:30 PM- Candelaria

فيلم فى منطقة مشاعر الحب بين شريكين فى مرحلة متقدمة من العمر زى Amour كده بس على سكيل أكبر له علاقه بالحب والجنس والفقر وكوبا وأختلاف التركيبة المجتمعية باختلاف السياسة والفن ولون البشرة والمرض والوحدة، فيلم مش رومانسى على الاطلاق ومش دراما على الاطلاق برضه وفيه كوميديا سوداء نقدر نوصفه انه تجربة شعورية مهمة.

 

اظهر المزيد

مقالات ذات صلة

زر الذهاب إلى الأعلى
Verified by MonsterInsights